ವಾಣೀ ಪರಮ ಕಲ್ಯಾಣಿ

ವಾಣೀ ಪರಮ ಕಲ್ಯಾಣಿ – ವಾರಿಜೋದ್ಭವನ
ರಾಣೀ ನಾರೀ ಶಿರೋಮಣಿ
ಕ್ಷೋಣಿಯೊಳಗೆ ಸರಿಗಾಣೆನೆ ನಿನಗೆ ಸು-
ಪ್ರಾಣಿಯೆ ಹರಿಪದರೇಣು ಧರಿಪೆ ಸದಾ

ಸರಸ್ವತಿ ನಿತ್ಯಾಸಾವಿತ್ರಿ ದೇವಿ ಗಾಯತ್ರಿ
ಸರಸಿಜದಳ ಸುನೇತ್ರಿ
ಸುರಮುನಿ ನಿಕರ ಸ್ತೋತ್ರಿ – ಶೋಭನಗಾತ್ರಿ
ಕರುಣಾಸಾಗರೆ ಪವಿತ್ರಿ
ಚರಣದಂದಿಗೆ ಪಂಚ ಬೆರಳು ಭೂಷಣ ಧ್ವನಿ
ಸರವು ಕನಕ ಗೆಜ್ಜೆ ಸರಪಳಿ ಪೊಳೆವಾಂ-
ಬರಧರೆ ಸುಂದರಿ ಎರಗುವೆ ಎನ್ನನು
ಎರವು ಮಾಡದೆ ತ್ರಿಕರಣ ಶುಧ್ಧನೆ ಮಾಡೆ ||1||

ಸರ್ವರಾತ್ಮಕೆ ಪ್ರಖ್ಯಾತೆ-ಧವಳಗೀತೆ
ಸರ್ವರಿಗೆ ಮಹಾ ಪ್ರೀತೆ
ನಿರ್ವಾಹವಂತೆ ಪತಿವ್ರತೆ ನಿರ್ಮಲ ಚರಿತೆ
ಪೂರ್ವದೇವತೆ ಹರಿಜಾತೆ
ಉರ್ವಿಯೊಳಗೆ ಮದಗರ್ವದ ಮತಿನಾ-
ನೋರ್ವನಲ್ಲದೆ ಮತ್ತೋರ್ವನ ಕಾಣೆನು
ಪೂರ್ವಜನ್ಮದ ಪಾಪ ಪರ್ವತದಂತಿದೆ
ನಿರ್ವಾಹವನುಮಾಡೆ ದೂರ್ವಾಂಕುರದಿ ||2||

ನಗೆಮೊಗದ ಜಗದಂಬೆ-ನೀ ಗಂಧಲೇಪಿಸಿ
ನಿಗಮಾಭಿಮಾನಿ ಸುಜ್ಞಾನಿ
ಬಗೆಬಗೆ ವಿದ್ಯಾ ಭಾಸಿನಿ-ಶುಭಲಕ್ಷಣೆ
ಅಗಣಿತ ಫಲದಾಯಿನಿ
ಝಗಝಗಿಸುವ ಕರಯುಗಳ ಭೂಷಣ ಪ –
ನ್ನಗವೇಣಿ ಕುಂಕುಮ ಮೃಗಮದ ವೊಪ್ಪಲು
ಜಗತ್ಪತಿ ಪ್ರದ್ಯುಮ್ನ ವಿಜಯವಿಠ್ಠಲನಮಗಳೆ
ಸುಖಾತ್ಮಕೆ ಜಗದಿ ಶುಶ್ರೋಣೆ ||3||